07/08/2023
3 րոպե կարդալու համար Եկել է մեր բնակելի տարածությունները բարեփոխելու ամենաճիշտ ժամանակը, քանի որ վերջին տարիները կտրուկ փոփոխություններ բերեցին մեր բնակարաններում՝ դրանք դարձնելով ոչ միայն բնակության, այլև աշխատանքի, խաղերի, հանգստի և ստեղծագործականության էպիկենտրոն: 2023-24-ին ինտերիերի դիզայնի լավագույն միտումներում արտացոլվում են այդ փոփոխությունները՝ դրսևորելով կայունության, մաքսիմալիզմի, տեխնոլոգիական ինտեգրման և ձեռագործ աշխատանքների յուրօրինակ համադրություն: Եկե՛ք պարզենք, թե այս տարի ինչն է նորաձև բնակարանի դիզայնում:
1. Էկոլոգիական դիզայն
Հաշվի առնելով, որ էկոլոգիականությունը դիզայնի առաջնագծում է, զարմանալի չէ, որ 2023-24 թվականի ինտերիերի դիզայնի միտումներում գերակշռում է էկոլոգիապես մաքուր նյութերից պատրաստված կահույքը: Թե՛ բնակարանատերերը, և թե՛ դիզայներներն իրենց ընտրության մեջ ավելի ու ավելի հաճախ են նախապատվությունը տալիս վերամշակված կամ վստահելի աղբյուրներից ստացվող նյութերից պատրաստված կահույքին: Հատուկ ուշադրություն է դարձվում նաև արտադրանքի երկարակեցությանը և որակին, քանի որ այդպիսի ապրանքների ձեռքբերման համար ներդրումներ կատարելը և՛ ոճային է, և՛ էկոլոգիական:
2. Մաքսիմալիզմ
Մինիմալիզմն այս տարի հետին պլան է մղվել, իսկ մաքսիմալիզմը դարձել է 2023-24 թվականի ինտերիեր դիզայնի շարժիչ ուժը: Համարձակ, վառ գույները հողագույն երանգների հետ համադրվելով ստեղծում են բազմաշերտ, տեսողությունը շոյող տարածք: Ինչ վերաբերում է հյուսվածքներին և նախշերին, ապա դրանք պետք է լինեն ավելի ու ավելի շատ, այնպես որ մի՛ վախեցեք խառնել և համադրել դրանք՝ ստեղծելով այնպիսի տարածք, որը համապատասխանում է հենց Ձեզ:
3. Բազմաֆունկցիոնալ կահույք
Մեզնից շատերն այսօր աշխատում են տնից կամ ունեն ճկուն աշխատանքային գրաֆիկ և տանն են անցկացնում աշխատանքային օրվա մի մասը: Այս իսկ պատճառով բազմաֆունկցիոնալ կահույքի առկայությունը ամենաարդիական միտումներից է ժամանակակից ինտերիերում: Հետևաբար անհրաժեշտ է մտածել այն մասին, թե ինչպես միևնույն կահույքը կարելի է օգտագործել մի քանի նպատակներով, օրինակ՝ գրասեղան, որը վերածվում է ճաշասեղանի, կամ բազմոց, որի տակ պահեստային տարածք կա: Այս միտումը նպատակ ունի առավելագույնս օգտագործել բնակելի տարածքը՝ անկախ նրա մեծ կամ փոքր լինելուց:
4. Կենսաֆիլիական դիզայն
Կենսաֆիլիական դիզայնը՝ արտաքին կենսական աշխարհը ներս բերելը, 2023-24 թվականի գլխավոր միտումն է, որը պայմանավորված է հանգստության և բնությանն ավելի մոտ գտնվելու մեր միասնական ձգտումով: Սենյակային բույսերը միայն սկիզբն են. մտածեք նաև պատերը մամուռով կամ որթատունկերով ձևավորելու, բնական հյուսվածքներով կահույքի (ռոտանգ, ջուտ) և հողագույն երանգների մասին:
5. Տեխնոլոգիական ինտեգրում
Խելացի տան տեխնոլոգիան շարունակում է զարգանալ, զարգանում է նաև տեխնոլոգիական ինտեգրումը մեր ինտերիերին: Այստեղ խոսքը ոչ միայն նորագույն սարքերի օգտագործման մասին է, այլև դրանք բնակարանի դիզայնում ներդաշնակ կերպով տեղավորելու մասին: 2023-24 թվականին տեխնոլոգիան տեղ ունի յուրաքանչյուր սենյակում՝ լինի դա ձեր տրամադրությանը հարմարվող խելացի լուսավորություն, խոհանոցային տեխնիկա թե ձայնով կառավարվող տնային օգնական:
6. Նորարարություններ տնային գրասենյակում
Նույնիսկ եթե մենք հարմարվում ենք «նոր նորմալին», հարմարավետ, լավ կահավորված տնային գրասենյակի կարևորությունը մնում է առաջնային: Մտածեք էրգոնոմիկ կահույքի, ամենատարբեր աշխատանքային առարկաները տեղավորելու բավարար տարածքի և առատ բնական լույսի մասին: Սա կարող է օգնել, որպեսզի ձեզ ավելի հարմարավետ զգաք տնային գրասենյակում: Աշխատանքային փոքր տարածքների համար արդիական է տրանսֆորմացվող կահույքը, օրինակ՝ ձևափոխվող բազմաֆունկցիոնալ գրասեղանները, դարակներն ու աթոռները
7. Ձեռագործ դեկորներ
Ձեռագործ ինքնաշեն դեկորների պատրաստման միտումն արագորեն աճում է, քանի որ մարդիկ փնտրում են իրենց ոճն արտահայտելու եզակի, անհատական դրսևորուման հնարավորություն: Որմնանկարները, գոբելենները կամ ինքնատիպ վերանորոգմամբ հին կահույքը յուրահատուկ ոճ են հաղորդում տանը՝ այն դարձնելով իսկապես ձերը:
Ամփոփում
2023-24 թվականի ինտերիերի դիզայնի գլխավոր միտումները լայն հնարավորություններ են ընձեռում՝ ստեղծելու տարածք, որը կլինի ոչ միայն ոճային, այլև անհատականացված, էկոլոգիապես մաքուր և ֆունկցիոնալ։ Անկախ նրանից՝ պլանավորում եք հիմնանորոգում, թե պարզապես թարմացնում եք կահույքն ու դեկորը, այս միտումները կարող են ոգեշնչման աղբյուր և գործողությունների ուղեցույց լինել՝ ձեր տունը իսկական հանգրվան դարձնելու հարցում:
Հիշե՛ք, որ այս միտումները միայն ուղեցույցի դեր են կատարում, և բնակարանի դիզայնի մեջ ամենակարևոր հանգամանքն այն է, որ ինտերիերը համապատասխանի ձեզ և ձեր ապրելակերպին: Ի վերջո, ձեր տունը պետք է լինի ձեր և ձեր ճաշակի արտացոլումը: Վայելե՛ք արարման, նորարարության և անհատականացման գործընթացը և առավելագույն բավականություն ստացեք ձեր ինտերիերի դիզայնից:
