04/11/2024
2 րոպե կարդալու համար Գեղեցկության աշխարհում 2024-2025 թվականների աշուն-ձմեռային սեզոնը բերում է նոր հավասարակշռություն՝ բնական տեսքի և վառ դիմահարդարման միջև։ Այսօր կխոսենք դիմահարդարման, վարսահարդարման և մանիկյուրի նոր թրենդների մասին։
Դիմահարդարում․ Բնական նուրբ շեշտադրումով
Ոսկե միջինի թրենդ։ Դիմահարդարման մեջ տիրում է հավասարակշռություն բնականության և արտահայտչականության միջև: Ոգեշնչվեք բնական փայլով, ընտրեք թեթև երանգներ, որոնք միայն ընդգծում են մաշկի գեղեցկությունը:
Այտեր և շիկնանք։ Այտերի համար հայտնի են վարդագույն-մանուշակագույն երանգները, որոնք ստեղծում են սառը թարմության էֆեկտ: Հարմար են նաև դասական դեղձագույն-դարչնագույն շիկնանքները, որոնք կատարյալ ներդաշնակում են աշնանային կերպարի հետ և սահուն անցնում ձմեռային սեզոն:
Շրթունքներ առանց հստակ եզրագծի։ Անփույթ շրթունքներով կերպարները դառնում են ավելի ու ավելի հայտնի: Գույնի թեթև շփումը մատով եզրագծի երկայնքով շրթունքներին տալիս է բնականություն և արտահայտչականություն: Ավելի լավ է օգտագործել երանգներ, որոնք մոտ են ձեր շրթունքների բնական գույնին՝ մի փոքր ավելի մուգ կամ բաց:
Շեշտը թարթիչների վրա։ Ոգեշնչված 60-ականներից՝ խիտ, ծավալուն թարթիչներ: Այժմ թրենդային են արտահայտիչ և փարթամ թարթիչները, որոնք ընդգծում են ինչպես վերին, այնպես էլ ստորին շարքը: Սա հարմար թրենդ է նրանց համար, ովքեր կարոտել են հագեցած հայացքին:
Հիմնական տոն․ Բնականություն և փայլ
Թեթև և բնական տոն։ Հիմա ամենաշատը գնահատվում է թեթև տոնալը, որը չի ծանրացնում մաշկը։ Կարող եք ընտրել և՛ մատ, և՛ փայլուն տեսակները՝ կախված ձեր նախասիրությունից։ Կարևորը, որ արդյունքում մաշկը թարմ ու բնական տեսք ունենա։
Սանրվածքներ՝ բնական ու ծավալով
Կասկադը մնում է արդիական սանրվածք, որը մազերին տալիս է ծավալ և թեթևություն: Այժմ շերտավոր կտրվածքը սկսվում է ավելի ցածր՝ մոտավորապես կզակի կամ անրակների գծից, ինչը սանրվածքին տալիս է անկաշկանդ տեսք:
Բոբ և դրա տարբերակները։ Անհավասար ճակատի հերափունջով բոբը կամ երկարացված բոբն առանց ճակատի հերափնջի կերպարին տալիս են ծավալուն տեսք: Գերկարճ սանրվածքների համար մոդայիկ է պիքսի-բոբը, որը ստեղծում է հավասարակշռություն կանացիության և համարձակության միջև:
Շեգի և մուլետ։ Ավելի համարձակ կերպարի համար հարմար է շեգին կամ մուլետը: Այս սանրվածքները ստեղծում են օդային, թեթևակի խառնված տեսք՝ ավելացնելով խաղայնություն և ինքնավստահություն:
Ներկում․ Բնականություն երանգներով
Տերակոտա և սալորագույն երանգներ։ Բնականության և համարձակ երանգների համադրություն: Տերակոտա գույնը հարմար է նրանց համար, ովքեր նախընտրում են ջերմ երանգները, իսկ կապտավուն երանգով սալորագույնը՝ մուգ մազերի համար, կերպարին ավելացնելով խորություն:
Ոստրեային բլոնդ։ Մոխրագույն-բեժ բլոնդը թեթև ավազագույն երանգով իդեալական է ձմռան համար:
Մանիկյուր․ Խորը գույներ և մինիմալիզմ
Մթնշաղային կապույտ։ Նոր տարում ամենաթրենդային գույնը մանիկյուրի համար կլինի մթնշաղային կապույտը։ Այս խոր ու նուրբ երանգը շատ լավ է նայվում հատկապես ձմռանը։
Էսպրեսո և բալի կոլա։ Մուգ, հագեցած գույները, ինչպիսիք են էսպրեսոն և բալի կոլան, մանիկյուրին տալիս են նրբագեղություն: Այս երանգները իդեալական են երկար եղունգների համար՝ ստեղծելով նրբության էֆեկտ:
Նյուդ և բնականություն։ Առողջ, խնամված եղունգները թեթև փայլով մնում են արդիական: Թափանցիկ լաք, ֆրանսիական մանիկյուր՝ հիանալի գաղափարներ են ամենօրյա կերպարի համար:
Ամփոփում
2025-ի թրենդները շատ բազմազան են, ու ամեն մեկը կգտնի իր ոճը։ Կարող եք համարձակ փորձել նոր բաներ՝ միշտ հիշելով բնականի ու վառ շեշտերի հավասարակշռությունը։ Եվ ամենակարևորը՝ հիշեք, որ իսկական գեղեցկությունը գալիս է ներսից։
